فاس نيوز ميديا جريدة الكترونية جهوية تعنى بشؤون و أخبار جهة فاس مكناس – متجددة على مدار الساعة
من مراسلاتكم:
( كاتكون غادي للقراية فالصباح ماعليك مابيك … و دماغك كولو كايدور حول البرنامج لي عندك فهاد النهار … و نفس الحساب الروتيني ديال فلوس الطوبيس و البوليكوبات و البحث و انك تكون عندك بلاصة فهاد البلاد ..
ماعليك مابيك بشكارتك فيها الكتب … كاينزلو عليك تلاتة ديال المشرملين بتلاتة ديال الجناوا كايكزرو فيك كايديرو فيك هاد الحالة( الصور) … كاتغوت كاتقاوم و هوما كايفصلو فيك امام الملأ فالنهار الكهار مع 11 صباحا و فشارع كبير… و نتا كاتغوت و كاتستنجد بخلق الله عسى شي حد غر يغوت و يقول اللهم ان هذا منكر … لكن كلشي كايتفرج…
بقيت مليوح فداك القنت و دماياتي كاتسيل … و كون ماكانش واحد مول الطريبورطور هزني هاكاك و داني للطبيب …
بقيت مليوحفالطبيب .. كانشرول بالدم لقرابة نص ساعة و فاش كان دايز الدوكتور شديت فيديه باش نقولو يدخلني بقا كايغوت عليا علاش ندوي معاه… و مزال دماياتي كاتسيل …
بعد حين دخلوني للسطاجيرات … رجل بنجوها و رجل بلا بنج كاتتغرز….
طلبت شهادة طبية لأنني كانقرا و غايتحسب عليا الغياب .. قالولي بأن السيد المكلف بهاد الأمر كونجي… و ماكاينش البديل… و سيفطني للغساني باش ناخد الشهادة… و يا ليتني مامشيتش … البشر مرخصينو و منشور و الزحام و مابغاوش يستقبلوني ولا يدويو معايا…
مابكانيش حريق الضربات… بكاني داك المظهر البشع لي فالطبيب…
و حتا فالديكلاراسيون … تلاتة ديال الكوميساريات عاد لقينا لي يدوي معانا… و تقيد المحظر ضد عصابة مجهولة.
الحصيلة هي خمسة ظيال الضربات بسبعة دالغرزات.. و استخالة آنية فالمشي… هادشي بدون الضربات لي كانو جايين جهة الكلوة ديالي و جهة الكتف…
بس: اتأسف عن بشاعة الصور
بس 2: هادشي وقع صباح اليوم (الأربعاء 23 ماي 2018 بفاس))
